معادلة كلية هندسة

يطلق عليها العديد من الأسماء معادلة هندسة أو معادلة كلية الهندسة أو معادلة هندسة القاهرة أو المعادلة للدبلومات الفنية و الصناعية أو معادلة المعاهد و الدبلومات أو معادلة كلية هندسة كل  هذه الأسماء و أسماء آخرى كثيرة مسميات لشئ واحد فقط و هى المعادلة ( معادلة كلية الهندسة ) طب اية هيا و اية حكايتها ؟؟؟ ما تيجو نشوف مع بعض

معادلة كلية هندسة

بص يا سيدى معادلة كلية هندسة دى حاجة كدة ربنا بعتها لناس هدية بس للأسف فى ناس كتيرة منهم ما تعرفهاش أو بيتجاهلوها علشان هم ما عندهم استعداد انهم يعملوها او علشان الاشاعات الكتير اللى بيسمعوها عنها و المفروض ان المعادلة دى فرصة ذهبية لازم اى حد يمسك فيها بإيده و سنانه و ما يخليهاش تروح منه بدون ما يقدر من خلالها يغير مستقبله و مصيره و حياته .

فى ناس كتير حاولت تعمل المعادلة و فشلت فيها بس فى ناس تانية أكتر حاولت تعمل المعادلة و نجحت فيها , المهم انت عاوز تبقى مين فى دول ؟؟

لو سألت اللى نجحوا فى معادلة كلية هندسة يقولولك دى سهلة جدا و أسهل منها مافيش , و لو سألت اللى فشلوا فى المعادلة هيقولك دى صعبة جدا و اللى بينجح فيها بينجح بالكوسة , أما لو سألتنى انا هأقولك ولا هى سهلة جدا و لا هى صعبة جدا و لا فيها فيها كوسة و لا بطاطس .

كل القصة و ما فيها إن اللى بيذاكر و بيجتهد هيشوف الحاجة قدامه سهلة و بسيطة و هينجح بإذن الله , أما اللى مش بيذاكر و بيلعب هيشوف الدنيا صعبة و متعقدة و لازم يشوف شماعة يعلق عليها فشله و هى الكوسة .

المطلوب منك انك توزن الأمور و تحكم عقلك فى الموضوع و تسمع من الناس اللى نجحت و تسمع من الناس اللى فشلت و انت اللى تقرر تعمل معادلة و لا لا بس أول ما تقرر  تعمل معادلة اسأل نفسك سؤال , و لازم تجاوب على نفسك بكل صراحة و هو

إنت بتعمل معادلة كلية هندسة ليه ؟؟

لانك لو داخل المعادلة و مش واخد قرارك انك هتموت و تذاكر و تعمل اللى عليك 99  % ( مش هاقول 100% لأن الكمال لله وحده ) يبقى ما تعملهاش و هى مش صعبة بس أكيد هتقابلك تحديات و التحديات دى هى اللى صعبة زى أى حاجة ناجحة بتعملها فى حياتك و لو انت مش واثق و مؤمن باللى انت بتعمله اعرف ان مصيرك هو الفشل .

حاول تقعد مع نفسك و تفكر كويس انت عاوز اية بالضبط و تاخد قرارت بهدوء و بعقل و إن شاء الله ربنا يهديك و تصل الى القرار الصحيح اللى فيه مصلحتك و يكتب لك كل ما هو صالح و مفيد .

و أخيرا يا عم أجاوبك بقى على السؤال بتاعك ( ايه هى معادلة كلية هندسة ؟ ) هى مسابقة سنوية تعقدها كلية الهندسة جامعة القاهرة لطلبة الدبلومات و المعاهد الفنية و الصناعية تمنحهم فيه الفرصة للإلتحاق بكليات الهندسة الحكومية الموجودة بمحافظات جمهورية مصر العربية , و يتم توزيع الطلاب الناجحين على كليات الهندسة تبعا للتوزيع الجغرافى لهم .